香港新浪網 MySinaBlog
« 上一篇 | 下一篇 »
yeemui | 7th Sep 2015, 5:37 PM | 我在閒談 | (2943 Reads)

認真MODE:千萬不要買那些廉價的驗身PLAN

我中伏的那間,叫盈康醫療集團  SMART HEALTH,在佐敦嘉賓大廈

 

所謂廉價,大概是那些從一些非醫療渠道買得來的體檢計劃,原價唔知幾千,優惠價一千那類。

 

而我的遭遇,是從GROUPON買回來的,起初諗住平平哋,好基本咁驗一驗,有事再進一步搵醫生。

其實,這個想法是很錯的,驗身機構不專業,報告說你沒事,你會掉以輕心,報告說你有事,你又要重頭搵醫生睇,嘥錢嘥時間嘥精神,亦會因為多了無謂的擔心而死很多細胞。

 

是咁的:

 

這類驗身,一般會用一個平價作招來,但埋到去,會sell你驗這驗那,結果,成件事貴過入私家醫院做。

 

首先,無醫生同你講解report,只有姑娘,但最終向你講報告的,是不是註冊護士呢?我有保留。

 

當落搭後,她們解釋:係醫生同你講就唔會咁平啦,傻豬!

 

我當是成本問題,平價沒有醫生講解,OK那惟有怨自己貪平吧!

但問題是,她們會不厭其煩,再sell你一啲咩驗血尊貴套餐,又呢又路,無啦啦又洗多三差嘢!最重要,當中包含一些你無必要驗的ITEM,例如XX癌指數,那類指數,其實只供一些已確診癌症的病人來作定期監察用的。如果,你不是被專科確診患上癌症,那指數,無論正常與否,對你是沒意義的。

  

我先照乳房超聲波,RADIOLOGIST(我當佢真係有專業資格先啦下)話有兩粒不知名腫物在12點位,一粒要膽心,一粒無咁膽心。而十二點位,我自己是摸不到的。她建議我再做mammogram, 心想,既然照出狀況,惟有再畀錢進一步檢查。

 

出到房門,那SALES姑娘,就好似中咗六合彩般興奮,打開本乳癌患者傷口的相簿,力SELL個照MAMMOGRAM呢類負面hardsell行為真係好討厭。

 

我忍不住,在她全面打開那相簿之際對她說:有關這方面的資料,我有一點認識,也相信比你認知得多,唔該你冚返埋你本相簿!

她:好好好,冚埋唔睇!

 

我對她們說我怕做mammogram會好痛。

接著,那幾隻圍住我想開單的禿鷹,其中一個就同另一個打了個眼色,再對我說:你上到去話阿ling介紹嘅,唔同架而家,好好手勢。

嘩,啲口脗好唔專業囉,澳門手信街拉客咩。

 

在我準備拿袋去照MAMMOGRAM之際,SALES姑娘好驚地提我未簽卡畀錢照那個MAMMOGRAM

而我,繼續沉唔住氣回應:得勒,而家攞緊我張卡出嚟畀你碌嘞!SALES姐姐!

 

我被安排在同一幢大廈上多四層樓的醫務所做mammogram。

雖然,這診所環境專業很多,但我照到一半,跟住按指示繼續進行另一半,部機就突然down咗!我又要第日再照過,真係令人崩潰。

 

多翻折騰,十四日後打去攞報告(正常即日都有啦,畀盡咪三日,你估政府要處理幾區病人咁咩),佢話要聽姑娘讀報告呢,就要等到最快7月30。 其實,我已約專科24號見醫生,等得佢嚟,蚊瞓!(結果,我喺30號就做手術啦,真係等埋發叔先好唔好?)

 

結果,我只拿報告,跟手兩日後見專科醫生。

 

上到去,SALES姑娘給我一些print out,我問:有無mammogram啲片可以攞走?

她:無架!

我問多兩次,她都答沒有!

由於我要趕住返工,而且都急住睇下啲medical report,我沒時間與她理論。

 

幾經辛苦,我喪查字典及上網解讀那些醫學名詞,但發現,為何ULTRA SOUNDMAMMOGRAM的結論是不對的?!一個評為第三級(較安全),另一個評為懷疑個案,要進一步調查。

那我要信那一份報告。

 

過了兩天度秒如年的日子,終於睇到專科醫生,診所也奇怪為何會沒有片取回。

 

專科醫生話ultra sound report 同 mammogram report 在各自描述唔同位置的瘤。

我當場畀間化驗所激到啤一聲。

  

由於是由間化驗所做ultra sound 同 mammogram reports ,但口徑不一,但我相信那盈康醫療集團 SMART HEALTH 的超聲波不夠專業,多於做MAMMOGRAM的那一間。

 

但兩間化驗所都各出岔子,這麼不專業的巧合,九星連珠一次過發生,都真係要極度唔專業才可達致這個效果!人與機器都同步甩轆,是我倒楣嗎?

 

故事未完。

 

由於我要入院,手術前,醫院打電話來要我交出 MAMMOGRAM的片來做ref...

我答沒有,但對方謂如果沒有,可能要我再照,

我心諗:唔係嘩!

 

我惟有打去盈康醫療集團問。

今次,佢竟然反問:梗係有片啦,無片攞咁照嚟做咩?!

我今次個反應係: 啤~~~~~~~!

 

又要撲返去佐敦提取我一早應得的菲林片,然後又要我親自再送片返醫院!嘥車錢,嘥時間,嘥我氣去爆鑊嗰班女!

回到那UP DUP的化驗所,我一見那SALES姑娘,我對她說:係﹣你﹣呀,係你當日同我講話無片攞走架!

她:我?

我:係~你~呀!(爭在未加句柒頭)(真係想一張摺櫈車落佢個頭度,又要入院又盛,仲要我咁頻撲經已火都嚟,仲要對住呢類SALES!) 

 

總結:不要學我貪平貪方便。其實如果有住院保障,搵醫生寫紙入院照就連錢都慳返!呢次真心蠢!

 


[2]

好彩買之前上網search下睇到你篇文,買左就pk啦😱


[引用] | 作者 Vava | 21st Feb 2017 9:47 PM | [舉報垃圾留言]

[1]

感覺體檢已被視為一盤大生意, 許多生意人一窩蜂去做, 到處派傳單, 以前信箱都收過幾次, 說是憑宣傳單張幫襯就有優惠. 就像找裝修公司沒試過真的不知道質素如何一樣, 最後可能氣死你, 把真實經歷跟別人分享確是好事, 公開不良公司名稱更可提醒其他人.

我試過手術切除良性腫瘤三次, 也有把經歷寫成網誌分享, 不過都是長在體表的粉瘤, 比起女性長在乳房的腫瘤簡單得多, 女性的確較男性承受多一些這類擔憂, 要好好愛惜自己身體.


[引用] | 作者 ep | 7th Oct 2015 8:55 PM | [舉報垃圾留言]